قالوا ...
******
نلاقيها منين بقى وإلا منين
ما تردوا علينا يا مجانين
بيقولوا بتقولوا الحكمة لما يحتاسوا العاقلين
إحتارنا و إحتار دليلنا نصدق و نكذب مين
العالم بيقول كلام و إحنا ف العسل نايمين
نفضل نذوق فى كل كارثة شطار ياإحنا ف التلوين
يقولوا فيه جنون بقر نقول مايصبش البنيآدمين
يقولوا فاشيولا الخضار ناكله حتى ولو بالطين
يقولوا فيه هرمونات نقول أعذنها حبة فيتامين
خللى ياعم الغلابة تاكل كانوا ياما محرومين
حتى السمك قالوا مزارع و اللبن بالفورمالين
و العالم كله خايف من أنفلونزا المطيورين
إلا إحنا بس اللى فضلنا شهور مطمنين
أصل مصر دى محروسة عليها عفاريت واقفين
طبعا ماحنا ياما أكلنا و لسه برضه زى القرود عايشين
ألبان مشعة من تشرنوبيل شربنا و قلنا كمان عايزين
والا توفيق عبد الحى أكلنا الطيور الجارحة وكنا بيه مبسوطين
الزيت م الشلجم عصروه و ياما كنا فيه قاليين
فاكرين أحداث رواندا و فضلنا من النيل شاربين
رغم إنهم قالوا إتلوث و إتحلل فيه الميتين
إحنا شعب بيعالج بطنه بأكلة فسيخ أو سردين
حتى المش بناكله بدوده و نكسر سمه ببصلتين
بعد ده كله نخاف من إيه خلينا بالبركة ماشيين
مهما قالوا و عادوا فى الفضائيات المذيعين
حانفضل كدة مصريين عالويل صابرين
بس سيبونا شوية ف حالنا و كفاية إشاعات و طنين
يا رب إنت اللى عالم بينا أسترها يا رب مع المساكين
ده إحنا عبادك مالنا حيلة و بسترك حا نعيش مستورين
أحسن حاجة نسد ودانا و نستعمى و إحنا مفتحين
عز الدين