سلام

اي مصلحة تمشيلها لازم تقولك دير طلب... و مرات اتقولك لازم تحط عليها دمغة.

اجراء بالكاد يكون روتيني في كل المصالح.

و اقعد دور انت وين تلقى ورقة الطلب... تقدر ادور علي اي قرطاسية في الطريق تنزل و تشري ورقة طلب .. و يمدلك البائع ورقة من نصف كشكول او ورقتين بربع دينار. هدا لو حظك مليح و ماطلبوش عليك دمغة.

المهم ... ورقة الطلب هده ... تكتب فيها و تعبر عن شعورك .. و في الاخير توقع توقيعتك المحترمة و تتفنن فيها علي اساس انها قوية و ميقدرش حد يزورها ... و كلك فخر ..مرات لين تنسى مشاكلك كلها و انت توقع.!!

و بعد التعب هدا كله... ياخذها الموظف من ايديك و يشدها بطريقة مكرمشة و كأنه سيلقي بها في سلة المهملات... ولكن!!
انه موظف ممتاز و لن يرمي بها الي سلة المهملات حتى و ان بدء لك بانه عكرشها...
انه سوف يضعها بين الاوراق الاخرى معززة مكرمة... اما انت هههههههه فسيقول لك في سره او عيني عينك ( تي امنع خيرلك... ياريت معاش تجئ ولا عاد توريني هالفنزوزة ) و لما تقوله اه كلمتني؟ ايقولك ايه ولي بعد اسبوع.

ضعت انت المحترم و بقت الورقة المعكرشة في الحفظ و الصون.

يعني ورقة الطلب يعني كانك ادير في طلب باش يهينوك!!

و السلام


ملاحضة : مش متأكد انكم تفهمون اللهجة الليبية بس انا افهم لهجتكم .. عموما ترجمة لبعض الكلمات في الموضوع :
تي امنع خيرلك= اهرب من قدام وجهي
الفنزوزة = الوجه القبيح
دمغة= طابع رسوم مالية مثل طابع البريد


و في النهاية اتمنى من الاخوة الاداريين في المنتدي تغيير اسمي الي (عميد البحر الليبي )