خرج ابن آدم من العدم قلت : ياه

رجع ابن آدم للعدم قلت : ياه

تراب بيحيا ... وحي بيصير تراب

الأصل هو الموت و الا الحياه ؟

عجبي !!!


أنا شاب لكن عمري ألف عام

وحيد لكن بين ضلوعي زحام

خايف و لكن خوفي مني أنا

أخرس و لكن قلبي مليان كلام

عجبي !!!!


ليه يا حبيبتي ما بيننا دايما سفر

ده البعد ذنب كبير لا يغتفر

ليه يا حبيبتي ما بيننا دايما بحور

أعدي بحر ألاقي غيره اتحفر

عجبي !!!


ورا كل شباك ألف عين مفتوحين

و انا وانتي ماشيين يا غرامي الحزين

لو التصقنا نموت بضربة حجر

و لو افترقنا نموت متحسرين

عجبي !!!


أعرف عيون هي الجمال و الحسن

و اعرف عيون تاخد القلوب بالحضن

و عيون مخيفة و قاسية وعيون كتير

وباحس فيهم كلهم بالحزن

عجبي !!








جالك أوان ووقفت موقف وجـــود

يا تجود بده يا قلبي يا بده تجــــود

ما حد يقدر يبقي علي كل شـــــــئ

مع إن – عجبي – كل شئ موجود

عجبي !!!



أنا كنت شئ و صبحت شئ ثم شــئ

شوف ربنا .. قادرعلي كل شـــــــئ

هز الشجر شواشيه ووشوشني قال :

لابد ما يموت شئ عشان يحيا شئ

عجبي !!

دخل الشتا وقفل البيبان ع البـــيوت

وجعل شعاع الشمس خيط عنكبوت

وحاجات كتير بتموت في ليل الشــتا

لكن حاجات أكتر بترفض تمــــــوت

عجبي !!


سمعت نقطة ميه جوه المحيـــــــط

بتقول لنقطه ما تنزليش في الغويط

أخاف عليكي م الغرق .. قلـــــت أنا

ده اللي يخاف م الوعد يبقي عبيط

عجبي !!!




حاسب من الاحزان وحاسب لها
حاسب على رقابيك من حبلها
راح تنتهى ولا بد راح تنتهى
مش انتهت احزان من قبلها

عجبى


يأسك وصبرك بين ايديك وانت حر
ايأس ما تيأس الحياة راح تمر
انا دقت من ده ومن ده عجبى
لقيت الصبر مر وبرضك اليأس مر

عجبى




يا طير يا عالى فى السما
طظ فيك
متفتكرش ربنا مصطفيك
برضك بتاكل دود وللطين تعود
تمص فيه يا حلو
ويمص فيك

وعجبى


أنا كان لى أب وكان رئيس محكمة
ستين سنة فى قضية واحدة ارتمى
بعد المداولة كشفت وجهه قريت
حلوة الحياة ومضحكة ومجرمة
عجبى



إيش تطلبى يا نفسى فوق كل ده
حظك بيضحك وانتى متنكدة
ردت قالتلى النفس قول للبشر
ما يبصوليش بعيون حزينة كده
عجبى





يا خالق الكون بالحساب والجبر
وخالقنى ماشى بالاختيار والجبر
كل اللى حيلتى زمزمية أمل
هتكفى ايه دى غير لحد القبر

وعجبى


ضريح رخام فيها السعيد اندفن
وحفرة فيها الشريد من غير كفن
مريت عليهم قلت يا للعجب
لاتنين ريحتهم ليها نفس العفن
عجبى

عيد عيد والعيال اتنططو ع القبور
لعبو استغماية ولعبو بابور
وبالونات ونايلونات شفتشى
ولا تختشى يا موت قصاد الحضور!!!!!!
عجبى

يا ملونين البيض فى شم النسيم
لون الحنين والبين وخمر النديم
ما تعرفوش سايق عليكو والنبى
تلونو الأيام بلون النعيم
عجبى





غمض عينيك وارقص بخفة ودلع
الدنيا هى الشابة وانت الجدع
تشوف رشاقة خطوتك تعبدك
لكن انت لو بصيت لرجليك تقع

عجبى

ولدى
اليك بدل البالون 100 بالون
انفخ وطرقع فيه على كل لون
عساك تشوف بعنيك مصير الرجال
المنفوخين فى الصدرة والبنطلون


عجبى


لا تجبر الانسان ولا تخيره
يكفيه ما فيه من عقل بيحيره
اللى انهارده يطلبه ويرضاه
هو اللى بكرا حيشتهى يغيره


عجبى





رقبة قزازة و فيها قلبي انحشر
شربت كاس و اتنين و رابع عشر
صادفت ناس من الخمرة ترجع وحوش
و ناس من الخمرة ترجع بشر
وعجبى



يا باب يا مقفول امتي الدخول؟؟؟
صبرت كتير و الي يصبر من الي يصبر ينول
دقيت علي الابواب قالوا مين؟؟؟
لو اعرف مين انا مش كنت اقول
وعجبى


ولدي نصحتك لما صوتي اتنبح
ما تخافش من جنية ولا من شبح
و ان هب فيك شبح قتيل اسأله
ما دافعش لية عن نفسة يوم ما اندبح





أيوب رماه البين بكل العلل
سبع سنين مرضان وعنده شلل
الصبر طيب
صبر ايوب شفاه
بس الأكيد انه
مات
بفعل الملل

وعجبى


لو فيه سلام فى الأرض وطمان وأمن
لو كان مفيش ولا فقر ولا خوف وجبن
لو يملك الإنسان مصير كل شىء
أنا كنت أجيب للدنيا ميت ألف ابن
وعجبى

يومى على الله تنتهى وتغيب
الشمس وتعود تانى يوم لهاليب
زى الحياة مأساة ومن كترها
بقى لا انتهائها ولا ابتدائها عجيب
وعجبى