ما انت اول من مشى يا صاحبي بهذا الطريق == ولا انت اول من تبع في دنيته درب الفراق

كل(ن) بدنياه جرّب وصار فيها كـالغـريـق == بعد ما تناسى محبه وخان به عهد الوثاق

وجا دورك يا حبيبي تشعل بقلبي حريق == وتنسى ما بينك وبيني من عهود(ن) واتفاق

غرّتك دنيا المهانه وخدعك ومضى البريق = = يا حسافه كيف مثلك يمشي بدرب النفاق

جيتني وانت تعاني وكنت بأحزانك شريق == تشتكي لي من الخيانه وعنا غدر الرفاق

قلت لك دواك جروحي وانسى ماضيك العتيق== محّد يساوي دموعك والحزن مر المذاق

شلت أحزانك بقلبي شلتها بقلب رقيق == ولا أظن في يوم اشكي لو عليّ الصدر ضاق

وفي النهايه خنت عهد(ن) بيننا اصبح وثيق == يا حسافه ما هقيتك تنسى لحظات العناق

روح كمّل طريقك علّك تلاقي رفيق == قلبي المجروح منك كان يحلم واستفاق

ولا تظن اني بدونك بحيا في هم(ن) وضيق == أحمد المعبود ربي يوم تاليه الفراق