الشاب يبي العرس ولا معه شين
بدا الأمل يذبل بنظرة عيونه
(غلا المهور) أحطها بين قوسين
هي مشكلتنا الدائمة تفهمونه
منها اشتكى في مجتمعنا الملايين
واللي عزف عن العرس لا تواخذونه
وعاداتنا تاقف بوجه العروسين
في شق الأنفس حلمهم يدركونه
وإن جيت للصالات تشوف بالعين
البذخ والاسراف ما تجهلونه
وين السعادة وين والعرس بالدَّين
ترفقوا بالشاب لا تذبحونه
توه معاشه ما وصل حد الألفين
مسكين منهن كيف يوفي ديونه
وأجار شقه خاليه ما بها شين
متقابلينٍ وأكلهم يطلبونه
واللي جمع بالحب ما بين قلبين
ويسّر أمور التكلفه والمؤونه
الله يفرّج كربته قولوا آمين
وشبابنا محتاجكم تدعمونه
فهد بن محمد المبلغ /حائل