وين انت يا حمدان امـك تناديـك .. وراك مـا تسمـع شكايـا وندايـا

يا مسندي قلبي على الدوم يطريـك .. ما غبت عن عيني وطيفك سمايـا

هذي ثلاث سنين والعيـن تبكيـك .. ما شفت زولك زايـر يـا ضنايـا

تذكر حياتي يـوم اشيلـك واداريك . ... والاعبـك دايـم وتمشـي ورايـا

ترقد على صوتي وحضني يدفيـك .. ما غيرك احدٍ ساكن فـي حشايـا

واليا مرضت اسهر بقربك واداريك .. ما ذوق طعم النوم صبـح ومسايـا

ياما عطيتك من حنانـي وبعطيـك .. تكبـر وتكبـر بالأمـل يـا منايـا

لكن خساره بعتني اليـوم وشفيـك .. واخلصت للزوجه وانا لي شقايـا

انا ادري انها قاسيـه مـا تخليـك .. قالت عجـوزك مـا ابيهـا معايـا

خليتني وسط المصحه وانا ارجيك .. هذا جزا المعروف وهـذا جزايـا

يـا ليتنـي خدامـة بيـن اياديـك .... من شان اشوفك كل يوم برضايـا

مشكور يا ولدي وتشكر مساعيـك .. وادعـي لـك الله دايـم بالهدايـا

حمدان يا حمـدان امـك توصيـك .. اخاف من تلحق تشـوف الوصايـا

اوصيت دكتور المصحه بيعطيـك .. رسالتـي واحروفهـا مـن بكايـا

وان مت لا تبخل علـي بدعاويـك .. واطلب لي الغفران وهـذا رجايـا

وامطر تراب القبر بدموع عينيـك .. ما عـاد ينفعـك النـدم والنعايـا


لاحول ولا قوة الا بالله العلي العظيم
والله شي يحزن ويقطع القلب بان يكون هذا جزا الانسانة التي ربت وتعبت ومرضت

كيف قست القلوب ......
وكيف يكون جزا من لو وضعت الدنيا بما حوت تحت قدميها فلن تجازيها.....

اللهم لا تجعلنا الا بارين بامهاتنا وابائنا العالمين
اللهم لاتجعل قلوبنا قاسية على من حولنا ومن نعرف ومن لا نعرف فكيف بامهاتنا واغلى انسانة على وجه الارض


اوصيكم احبتي بامهاتكم خيرآ
فوالله ثم والله لن يشعر اي انسان بقيمة امه الا عندما يفقدها وهي تحت التراب ....
فليغتنم كل انسان منكم وجود حبيبة قلبه وقرة عينه ( امه الحنون ) بالبر بها وتنفيذ كل رغباتها والسمع والطاعة لكل ما تريده ولا ننسى احبتي باننا سوف نجد هذا البر من ابنائنا بعد برنا بامهاتنا وابائنا

من روعتها نقلتها مرة ثانيه

وبارك الله فيك اخوي ومقصرت