الجزء الخامس والعشرون

سعود يطق ع مشاعل: ميشو حبيبتي نايمه
مشاعل كانت نايمه,, صحت ع صوت سعود,, وقامت تفتح
مشاعل وكلها نوم: هلا سعود
سعود يطالعها ومبتسم: عندي لك اخبار حلوه
مشاعل : ايش صاير؟؟؟؟
طبعا سعود قال لمشاعل كل شي عن طلال ,, وكيف بين لهم حبه لها
سعود : هاه تبيني اقول له انك موافقه اليوم ؟؟؟ او نتغلى لما بكره؟؟؟
مشاعل وهي تطالع سعود وبكل جديه قالت : سعود انا مو موافقه
سعود ضحك : ايه صح مانتي موافقه لانك راح تطيري من الفرحه
مشاعل بحزن : سعود انا اكلمك جد مقدر اوافق
سعود خاف وحس ان مشاعل جديه,, ايش تبي بالضبط هي تحب طلال وهالشي باين بعيونها,, ليش ما توافق؟؟؟
سعود : مشاعل ماني فاهمك؟؟؟ايش تبي بالضبط؟؟
مشاعل طالعت فهد اخوها والي نايم جنبها
مشاعل : تعال نطلع نتكلم برا
سعود طلع مع مشاعل وكله حيره ,, جلسوا بالصاله الي فوق
سعود : ميشو تكلمي حيرتيني مو قادر افهمك؟؟؟ رفضتي بندر لانك تحبي طلال,, والحين ترفضي طلال ليش؟؟؟؟
مشاعل : انا قطعت وعد لسلطان وفهد وفيصل اني ما اتركهم
سعود : ميشو ايش الي ما تتركيهم ,, عندهم امهم
مشاعل بحزن : امهم؟؟؟ انت ماتعرف امهم؟؟؟ من بعد ماتوفى ابوي,, صارت تضربهم,,, سعود هم صغار وخايفين ووحيدين ومستحيل اتركهم ,, انا خايفه عليهم من امهم
سعود : تخافي على اخواني من امهم ,, ايش هالكلام
مشاعل : انت ماشفت ايش تسوي لهم
سعود : ميشو معقوله تدفني حياتك معاهم ,,, طلال الي تتمنيه جاء لحد عندك ويبي يتزوجك
مشاعل تبكي: ماراح اكون سعيده وانا ادري انهم يتعذبوا,, انا مستعده اضحي بحياتي بس ماشوف دمعه بعيونهم ,,, خلاص ياسعود يكفي,, انا عطيتك رايي وخلاص,, بليز لاتفتحوا هالموضوع معاي مره ثانيه ابد
سعود: بس يامشاعل ايش راح اقول لطلال
مشاعل : قول له الي قلت لك وانشالله راح يتفهم
سعود: بصراحه هو واثق انك راح توافقي والله راح ينصدم
مشاعل: انشالله يلقى الي تعوضه عني
00000000000000000000000000000000000000000000000000 00000
في بيت طلال وبالتحديد في غرفه الاكل
ابو طلال : طلال ليش ماتتغدى
طلال : انتظر مشاعل تجي تغديني
الكل ضحك عليه
لمياء : وانشالله ماراح تاكل لما تجي تاكلك ,, صدقيني وقتها راح تكون من الاموات
طلال : انشالله كلها اسبوع وهي هنا
هيفاء شهقت: وانشالله ماراح تسوي حفله
طلال: اذا الحفله راح تاخذ وقت ماراح اسويها
هيفاء : لاحبيبي لازم نسوي حفله تبي تفشلني عند صاحباتي
ابو طلال: انتم تجهزون العصابه قبل الفلقه,, استنوا يوافقوا الناس
هيفاء: وليش مايوافقوا ماراح يلقوا مثل طلال , ,اصلا تلقاهم طايرين من الفرح
طلال: لا يابابا فال الله ولا فالك,, انشالله اخوانها موافقين
ابو طلال: يمكن البنت ماتوافق
طلال: هههههههههه لا معليش راح توافق
ابو طلال: قول انشالله
طلال: انشالله
هيفاء: اعمل حسابك ان زواجك في الفور سيزون
طلال: انشالله بالبطحاء بس خليني اتزوج
لمياء: لا ياحبيبتي مانبي الفور سيزون نبي نحطه في نياره
هيفاء: ياااااااااااي قديمه انتي مره
لمياء: قديمه والا مو قديمه مالي شغل
طلال: خلاص انا ارح اسوي حفلتين وكل وحده تعزم صاحباتها بمكان
الكل: ههههههههههههههههههه
00000000000000000000000000000000000000000000000000 000000
ام مشعل: والله هالبنت حيرتني معاها ماقدرت افهمها
نجود: خالتي اتركوها ع راحتها ولاتضغطوا عليها
مشعل: طيب ايش راح نقول للرجال
نجود: اتصلوا عليه وقولوا له الي قالته
مشعل: والله الرجال متعشم اننا نوافق,, بصراحه منحرج
نجود: اذا يحبها بيصبر لما تغير رايها
ام مشعل: ع قولتك
00000000000000000000000000000000000000000000000000 00000
في غرفه طلال
دق موبايله كان الرقم غريب
طلال: الو
العنود صاحبه هيفاء : هاي
طلال: نعم مين معاي؟؟؟
العنود : وحده معجبه
طلال: ع فكره اسلوبك قديم,,, وانتي مره بايخه
العنود انقهرت مافيه احد اتجرا يهينها: طيب علمني ايش الاسلوب الجديد
طلال: والله,,, تبي تعرفي الاسلوب الجديد
العنود: ايه
طلال : اوكي اسمعيه بس ركزي ع الصوت كويس
وقفل بوجهها
العنود ماتت قهر ,,, وعزمت اكثر انها تجيب راسه ع قولتهم
كان طلال يتقلب مو قادر ينام ,,, فرحان من قلبه,,, انقلب ع جنبه اليمين ويطالع المخده,,, لمسها
طلال"متى يا مشاعل تكوني هنا ,,, متى ارتاح بحضنك,, ومتى اتصبح بوجهك,, متى انام ع صورتك,, متى تكوني انتي حلمي,, وانتي دنيتي,, متى تكوني زوجتي وشريكه حياتي,,, متى تكوني نصفي الثاني,,, متى ياميشو متى,, متى ياقطوتي العبك ,, واحكي معاك,, متى ازعلك وارجع ارضيك,,, متى اكرهك وارجع احبك,,, متىىىىى ,, الله يصبرني بس"
واخيرا نام طلال بصعووووبه
00000000000000000000000000000000000000000000000000 00000
مشاعل كانت ليلتها صعبه ,,, ماتجرات حتى انها تحاول تنام,,, لانها عارفه ان النوم راح يجافيها,, والارق راح يكون من نصيبها,,, ياما تمنت السعاده مع طلال,, وهذا طلال الحين يعرض عليها الزواج وهي مو راضيه,, مستحيل تتخلى عن اخوانها خاصه بعد الي قالوه لها عن خوفهم من امهم ورعبهم منها,, وانهم يبوها هي الي تكون معاهم ,, معقوله تتزوج وتترك هالاطفال بيد وحده ماتخاف الله مستحيل
تمنت ان بكره مايجي,, كانت حاسه بفرحه طلال والي اكيد متوقع انه اراح توافق,, واكيد يتمنى اليوم الي راح يجمعهم اكثر منها بس مسكين مايدري انها راح ترفضه,,, حزنت عليه وعلى حالها,, وعلى الدنيا الي مو راضيه تخليها سعيده,,كان ممكن تتزوج وتترك كل شي وراها بس مستحيل راح تكون سعيده مع طلال وهي متاكده ان اخوانها يتعذبوا
سمعت صوت اذان الفجر ,, الله اكبر ,, الله اكبر ,, صارت تردد وراه ,, ,تذكرت ان الدعاء بين الاذان والاقامه مجاب باذن الله ,,, دعت ربها انها يفرج عنها كربتها ويبدل حزنها بفرح ويبعد عنها مايهمها ويكدرها,, وتوكلت ع الله
00000000000000000000000000000000000000000000000000 0000
في الصباح
سعود : مشعل تدق ع طلال والا ادق انا؟؟؟
مشعل : انا مستحي دق انت,, بعدين انت تمون عليه اكثر مني
سعود: الله يعين,,, والله اني متفشل بس بدق
مشعل: انت فهمه وجه نظرها وانشالله راح يتفهم
سعود: بصراحه ميشو قاهرتني ,, شلون تضحي ع شان اخواني وهم عندهم ام ترعاهم حتى لو كانت قاسيه عليهم في النهايه هي امهم
مشعل: صادق مع اني مقهور ع طلال لانه فرصه بالنسبه لمشاعل ماتتعوض,, وانا ماتكلم عن حالته الماديه بس,,, الولد باين عليه يحبها,, وهالايام صعب الواحد يلقى الحب الصادق,,, بس رغم كل هذا احترم قرار مشاعل وبصراحه كبرت بعيني ع التضحيه الي تسويها
سعود: اي تضحيه انت الثاني,,, تدري اروح ادق عليه احسن
00000000000000000000000000000000000000000000000000 00000
في سياره طلال
كان طلال يقاوم نفسه اكثر من مره ع شان مايدق على سعود ومشعل ,, ع الاقل مايقولوا ايش هالمرجوج
دق موبايله كان رقم سعود
طلال: الو
سعود : هلا طلال
طلال صارت حفله جوا قلبه من الخوف : هلا وغلا بسعود كيفك؟؟؟
سعود: بخير الحمدلله انت شلونك وشلون الوالد؟؟؟
طلال: الحمدلله
سعود : في المؤسسه انت ؟؟؟
طلال: لا والله في المحل حقي اشيك ع الشغل
سعود : ايه اجل مشغول؟؟؟
طلال: لافاضي والله ,, هاه بشر ايش صار بخصوص الموضوع؟؟؟؟
سعود : والله ياطلال مدري ايش اقول لك؟؟؟
هنا طلال بدى يخاف وقلبه ينغزه,, ليش يقول له هالكلام ,,, اكيد ميشو رفضت بس ليش ؟؟؟؟ شال هالفكره من راسه
طلال:ايش صاير؟؟؟
سعود: والله ياطلال مشاعل رافضه فكره الزواج
طلال ماسمع الا رافضه,, ليش ترفضه,,, مو هي كانت تحبه,, ليش ,,, قدم نفسه لها ,,, وقدم لها كل شي يقدر عليه,, اثبت لها حبه,,, واخر شي تتركه كذا بدون مبرر
طلال بصوت مبحوح: فيه سبب والا...
سعود: والله ياطلال هي ماترفضك انت,, هي ترفض فكره الزواج
طلال بصوت كله حزن : ليش؟؟؟
سعود : تقول ماراح تتزوج وتترك اخواني الصغار لوحدهم
طلال: بس على حسب علمي ان امهم موجوده
سعود : امهم قاسيه معاهم شوي ,,, وهي خايفه عليهم منها
طلال يعاتب : وليش ماخافت عليهم لما كانت تنوي تتزوج من بندر؟؟؟
سعود: والله ياطلال ماادري ,, انا منحرج منك
طلال: لا عادي ياسعود ,, انا مثل مااستنيتها هالشهور راح استناها لو سنين ,, وفي النهايه راح تقتنع
سعود : هي مو راضيه حتى اننا نفتح الموضوع معاها
طلال: سعود ودي اطلب منك طلب واتمنى ماتفهمني غلط ولاتردني
سعود: امر
طلال: سعود اظنك تعرف ان غرضي شريف وتدري اني احب مشاعل وماودي اخسرها
سعود: اكيد عارف هالشي وصدقني كبرت بعيني لما تقدمت لها لان هالشي يثبت لي انك رجال ومو راعي حركات الشباب ,, بس ماقلت لي ايش طلبك؟؟؟
طلال : والله اني منحرج منك ,, بس عارف محد يقدر يساعدني الا انت, واتمنى ياسعود انك تتفهمني
سعود: مع اني ماعرفت الطلب للحين بس ولايهمك مايصير خاطرك الا طيب
طلال: ماتقصر بيض الله وجهك ,,, سعود ابي اكلم مشاعل((وسكت شوي)) ابي اقنعها انا حاس اني اقدر اقنعها,, وماابي تعطيني رقم لها ,, ابي تعطيها موبايلك واكلمها وانت موجود,, ع شان تتاكد ان مو نيتي اني اكلمها من وراكم
سعود: ولا يهمك عموما انا بالشركه الحين,, اذا طلعت ادق عليك واخليك تكلمها
طلال فرح: مشكور ياسعود ,,, راح تسوي لي خدمه عمري ما انساها
سعود: ابشر ولا يهمك
00000000000000000000000000000000000000000000000000 000000
قفل طلال وهو متامل ان مشاعل فيه امل تتغير,, قهرته يسوي كل هذا ع شانها وترفضه,, ع شان عذر بايخ,,,, لاتكون ماتحبه؟؟؟ شال هالفكره من راسه,,, طيب معقوله ترفضه ع شان سبب تافه,,, حرام عليها تهدم احلامهم,,, لما حطموا كل الظروف واجتازوا كل المشاكل,, وصارت السعاده قريبه منهم ترفضه,,,, معقوله ماتحبه مثل مايحبها,,, معقوله لما صار الموضوع فيه زواج تتردد,,, معقوله المشاعر الي تملكها له مو كبيره لدرجه انها تترك كل شي وراها
00000000000000000000000000000000000000000000000000 000000
بوقت الغداء
كانت حال مشاعل ماتسر العدو ولا الصاحب ,, كانت تجلس معاهم ع الغداء تكمله عدد لااكثر,, حمدت ربها انهم خلصوا اكل,, يعني افراج,,, قامت مثل عادتها تروح تعزل نفسها بغرفتها مع اخوانها الصغار
ام مشعل : ايش رايك ياسعود ناخذ استراحه اليوم نطلع فيها نغير جو
سعود : والله فكره حلوه ياماما,, خليني ادق ع واحد يعرف استراحه زينه
ام مشعل : ايه الله يخليك خل مشاعل تغير جو ,, مسكينه حالتها حاله من بعد مارفضت طلال
سعود دق ع صاحبه
سعود: هلا ابو عبدالله
ابو عبدالله: هلا بسعود شلونك؟
سعود: تمام انت شلونك؟
ابو عبدالله: والله نشكر الله
سعود: ايش عنده اللبناني
ابو عبدالله: والله توني راجع من لبنان انا وام عبدالله
سعود: ياهوووووه اجل قالب اشقر,, صاير بروس ويليس
ابو عبدالله: اي اشقر ذبحتنا هالشموس في الرياض قلبنا ويل سميث
سعود: هههههههههههههه,, الله يعين
ابو عبدالله: اي والله ,, حيا الله سعود
سعود: الله يحييك,, اقول ابو عبدالله ماتخبر لي استراحه زينه ودنا نطلع مع الاهل اليوم
ابو عبدالله: انت تامر امر
سعود: مايامر عليك عدو
ابو عبدالله: عندي لك استراحه مره حلوه ,, متى بس تبيها
سعود: بعد المغرب
ابو عبدالله: خلاص انا راح اكلم لك الرجال,, وانشالله بعد المغرب اوصف لك المكان
سعود: الله لايهينك
ابو عبدالله: فمان الله
سعود : فمان الكريم
سعود تذكر انه مواعد طلال ع شان يكلم مشاعل ,, بس حس ان الوقت ابد ماينفع,,, قال خلني اخليها بالليل احسن
00000000000000000000000000000000000000000000000000 00000