>>>بيت راكان
كانت دانه جالسه تتقهوى مع امهات راكان وفيصل بحضن جدته مريم ومحمد بحضن جدته ام راكان ..
ام راكان ماكانت غبيه ولا نايمه على اذانها وعارفه ان دانه ابوها يضغط عليها تسكن معهم ..
ومن ذاك اليوم للحين وام راكان مايغمض لها جفن بين دموعها على وحيدها الي مات وتركها وبين عياله وامهم الي خوالهم يبونهم ..دورت حلول ودورت وللااسف مالقت كلا معه حق .. ابوها معه حق في الي يسويه رغم انها ولية نفسها لكن ذا مايمنع ان سلطته عليها رجعت بعد موت راكان .. وبين نارها الي شابه ضو وهي تتخيل اليوم الي بتفقد فيه احفادها الي تتجسد فيهم صورة راكان بعينها ..
ناظرت ام راكان (مريم) في دانه قد ايش تغيرت عن دانه الاوليه شي فيها مات بموت راكان ..
ماتدري هل هي النظره الشغوفه ..!
هل هي البسمه الي تنور الكون لا ابتسمت !
دمعت وهي تشوف بعيونها كيف ان دانه تضحك غصب عنها تبتسم غصب عنها ..
خلاص دانه جسد غادرته الروح !
فكرت دانه في نفسها وتذكرت عقب وفاة راكان بشهر يوم علمها اخوها خالد ان راكان ترك لها كل ثروته ونص الشركه .. مانست يوم اغمى عليها من الصدمه ومن قوة الحزن وش تبي دليل اكبر من ذا على انه كان يحبها .. ويثق فيها
دمعت عيونها وطعم البسبوسه الي تاكلها صار زي الرماد ..
رتب كل شي قبل لا يموت ..
قسم الــــــــــــورث !
امن حياتها وحياة امهاته !
وآآآآآآآآآآآآآآآآآآآآآآآآآه ياليته درى ان بيجيه عيال وبيكون ابو لاثنين
سالت دمعه خاينه منها .. ومسحتها طوالي
دق حارس البوابه يبلغهم ان ابو خالد دخل البيت ..
انقبض قلب دانه .. صايره جيات ابوها تضغط عليها مره وهي مو ناقصه مايكفي انها ماتقدر تنام الليل بين الدموع والوحده والوحشه في غياب نور البيت وسنده ...
وقفت وراحت للمجلس تستقبل ابوها ..
بعد ماسلمت عليه وجلست حســـــــت في وجهه شي ما يطمنها ..
طلبت منهم يرسلون قهوه ..
قال ابوها بدون مقدمات :- دانه
بصوت مخنوق :-سم يبه
ابوها :-شخبارك واخبار عيالك
دانه بحنان :-بخير الحمد لله بيكشخون وبيجون يسلمون عليك
ابو خالد :-هههههههههه بيجون يا حليلهم
دانه :-ههههههه ايه يبه صاروا رجال كبار ويلاحظون كل شي
ابو خالد بحنان الدنيا :-الله يخليهم لك
دانه :-اللهم امين .
وصلت القهوه ودخلتها الشغاله ...بعد كم دقيقه فتح ابوها الموضوع ..
ابو خالد :-دانه جهزي نفسك اخر الاسبوع بجي اخذك
انقبض قلبها :-تاخذني
ابوها وهو يتمالك نفسه تقديرا لشعورها :-ايه ماعاد لك جلسه هنا
مسكت اعصابها لا تنفعل او تنهار :-يبه هذا بيتي
ابوها بقسوه :-بيتك هو بيت اهلك
دانه بتدميع :-وهذا بيت رجلي
ابوها بصراحه قويه :-ورجلك مـــــــــات
ماقدرت تتمالك نفسها ونزلت دموعها بسرعه ..
تندم ابوها لقسوته معها لكنه ينقهر من عنادها :-دانه خلينا نتكلم بعقل
قاطعته وهي يالله ينفهم كلامها من البكا :-يبه أي عقل وانت تبيني اترك بيتي بيت راكان بيت عيالي كيف اترك امهاتي الله اخذ ولدهن وانت الحين تبي تاخذني منهن وتاخذ العيال يبه حرام والله ماراح يتحملن
ابوها بعناد :-انتي عرضــــــــــي وفي وجهي
شوي وتصارخ بكل صوتها لكنها تماسكت :-يبه انا ما سويت شي يستاهل هالكلام
ابوها :-عارف يبه لكني مقدر اتركك هنا بلحالك انا مو عاجز لا اصرف عليك وعلى عيالك
دانه :- طيب يبه رايي ماله قيمه
ابوها :-هنا واقولك لا ..
دانه وهي تمسح دموعها :-مقدر اترك بيتي
عصب ابوها :-انا امرك ما اشاورك
تنفست دانه بينها وبين نفسها عشان ما تنفعل ...
وفي هاللحظه دخلت المربيه عيال دانه عشان يسلمون على جدهم ..
سلم جدهم عليهم .. وجلس معهم وقت ثم وقف بيطلع ..
قال لدانه :-لا تنسين اخر الا سبوع الجاي تكونين جاهزه
عرفت دانه ان النقاش مع ابوها الحين زي قلته ومن هنا لين اخر الاسبوع فيه 7 ايام ..ومايندري وش الله كاتب فيها !
طلع ابوها من هنا وطارت لغرفتها متنفس احزانها والآآآمها من هنا ..
فتحت دفتر مذكراتها الي انولد على وجه هالدنيا بعد موت راكان ..
وكتبت فيه كل شي صار ... واخر شي كتبت /لمن تركتني يا نظر عيني انحرمت منك والحين يبون يحرموني من ذكراك /
،
،
،
،
>>>>>بيت ابو احمد
قال ناصر لابوه :-يبه انا ابيها غصب عن الي يرضى والي مايرضى
ابوه :-طيب انا قلت شي
ناصر :-ايه مو انت تقول لي انتظر لين يردون على ابو عبدالرحمن..
ابوه بعقلانيه :-ايه
ناصر مسك نفسه :-يخسي هالخايس ياخذ دانه وانا موجود
ابتسم ابوه ابتسامه صغيره من فرحته بولده وان خطتهم الي تناقشوا فيها ما يحتاج ينفذونها ويجيبون لنفسهم سعود جديد ..
طلع ناصر معصب ودق ابو احمد على ابو خالد :-هيه خطتنا الغها
انصدم ابو خالد :-ليه؟
كان ابو سعود وراه :-شفيه
ابو خالد :-ابو احمد يقول الغوا الخطه في تزويج ناصر دانه
ابو سعود انصدم بدوره :-ليه ..؟؟ ماعندنا عيال يخالفون راينا
ابو احمد في التلفون :-اسمعوني للاخير انتم شفيكم
ابو خالد :-وش وش فينا ترى طحنا بمشكله جديده ان زوجت البنت امنت مستقبلها وامنت لها بيت والحين ولدك مدري شفيه
ابو احمد :-هههههههههه يارجال اسمع الي بقوله
ابو خالد :-هات الي عندك
وعلمهم بكلامه مع ولده .. من الى !
انصدموا الشياب .. معقوله تجيهم بارده مبرده ..
ابو خالد بعد ماسكر من اخوه :-الله يريحك يا ناصر
ابو سعود :-الولد وحطيناه بجيبنا باقي بنتنا
ابو خالد :-الي خلانا نقدر على سعود وهو رجال فاهم وعاقل يخلينا نقدر على دانه تراها بنت ما يحتاج
ابو سعود بتردد :-ياخوي يكفي الي صار لنوف والله اني متحسف حسوفه ظلمتها بزواجها من سعود واخاف على دانه
ابو خالد :-الي صار صار . ونوف مخطوبه الحين
ابو سعود :-والله عمر رجال والنعم فيه بس متزوج
ابو خالد :-تسمي زواجه ذا زواج .. على حسب ماسمعت باقي على مرته عشان عياله الي توهم صغار ويحتاجونه
ابو سعود :-داري وعارف رجال والنعم بس نوف توها ماكملت 23 سنه ومخطوبه لمتزوج ..
ابو خالد :-لو متزوج ثلاث مو وحده وطلع رجال طيب ويستاهل ما يخالف .. ولا تنسى ترى لجده ابو ابوه فضل على ابونا
ابو سعود :-لا مانسيت ماهي من شيم الرياجيل نسيان الوقفات الي وقت الشده .. وجده ماقصر مع ابونا الله يرحمه..
ابو خالد :-اكيد وهذ رايي ابو احمد بعد
ابو سعود :-الله يقدم الي فيه الخير ..
ابو خالد :-اللهم امين ..
*
*
*
*
>>>عقب اسبوع
طبعا ابو خالد عجز في دانه تترك بيتها وكلما كلمها جلست تصيح او يغمى عليها ,, وماهانت عليه
لكن هالمره بيتفاهم معها من جد ، صح بتزعل منه الحين لكنها بتشكره لا كبرت شوي وبتشكره اكثر لانه أمّن مستقبل عيالها وجاب
لهم ابو يربيهم ويوجههم لطريق الصواب .
بعد ما دخلت دانه عيالها ورجعت له ..
قال بدون مقدمات :-ناصر ولد عمك خطبك مني قبل فتره
طاحت بيالة الشاهي بالارض وتكسرت :-هاااااااااااه
ابوها بعصبيه :-اقول لك ناصر خطبك وانا موافق
فزت من مكانها وقالت بقوه :-وانا مو موافقه
ابوها بعصبيه وهو يرفع صوته نوعا ما :- اجلسي
استحت دانه وجلست ..
قال :- انا عطيت الرجال كلمه وانتهى الموضوع
انصدمت دانه من طريقه ابوها وعناده قالت بدون تفكير :-ناصر مو رجال
صارخ عليها :-دااااااااااااااااااااااااااااااااااااااااااااااااا نه
انتبهت لزلتها وقالت :-يبه قصدي ان ناصر مو غريب ناصر ولد عمي قل له اني مو موافقه وانتهى الموضوع
خزها وقال :-الملكه الخميس عقب يومين فاهمه ولا لا
دانه للان مو مستوعبه شي ولا داخل مزاجها اي كلمه من كلام ابوها عشان كذا مافيه اي انفعال او اي ردة فعل ,, يمكن لانها
مستنزفه عقب اخر نقاش حاد كان بينها وبين ابوها والي هو قبل امس..
وقف ابوها وكانها موافقه مسكته مع يده وهي نوعا ما استوعبت الصدمه ..
دانه بذهول واضح :-يبه مابي اتزوج
ابوها :-مو بكيفك
سامحيني يبه لكن هالشي لمصلحتك ..