سنة حلوة يا جميل

على عتبة السنة الجديدة وقفت و إتسمرت أقدامى ..
مشوارى لسة طويل والا العمر ولى زى السراب قدامى .
من كام سنة كنا بنحلم و نرسم خيال لسنة 2000 ..
وكأننا ح نلاقى فيها عصاية سحر أو مصباح علاء الدين .
و مرت و جه بعدها ست سنين والسنة الجديدة لسة بتفتح باب ..
قلت أشوف اللى جرى لنا بكشف حساب .
يااااه .. لسة الأقصى أسير و جريح و كنا بنحلم بالتحرير ..
بحجارة ف إيد أطفال مالإحتلال فى ظلم مرير .
و الغرهاب اللى خلاص نزع الأمان من قلوب البشر ..
و العولمة دى ياترى خير والا فساد ع الأرض إنتشر .
صحيح الخير لسة موجود .. بنينا كبارى رفعنا سدود ..
خضرنا الصحرا جنوب الوادى وأكبر فرحة بعود مولود .
مش ع المحروسة بس أنا بتكلم قلبى على العالم نتألم ..
ليه نعيش فى صراع و حروب و عن العدل يادوب نتكلم .
و فين العالم شايفة أنا ماشى و التوهة وخداه ..
فلاح مصرى بسيط شاف حاله صعب عليه قال ياولداه .
شباب حيران بين الدروب ماشى يدور ع العنوان ..
تسألنى عنوان آيه ؟! أقول لك عنوان الإنسان .
أيوة صحيح تهنا و تاه منا الإنسان ويا الأيام ..
دور كدة حواليك تلاقيه يادوب ذكرى و أهام .
مشيت فى شارع الحياة راكب حصان الأمل ..
يا ح أوصل من بعد توهة يا يسبق وصولى الأجل .
سألت عرافة بيقولوا مخاوية الجن و العفاريت ..
ياترى تقدرى تعرفى طريق الإنسان .. قالت يا ريت .
تعالى يا ولدى إجلس هنا جانبى عالسجادة ..
قدامها طبلية بلدى بلدى عليها البخور و كام شمعة منقادة .
و كوم أحجبة فى بنورة – قالت لى باين عليك تعبان ..
تحب أشوف لك الطالع و إلا أقلب لك الفنجان .
قلت لها يا خالة إن كنتى صحيح علامة و بتعرفى المكتوب ..
قولى لى ليه الدنيا كدة صبحت فى حال مقلوب .
قالت لى السبب يا ولدى هو (سواد القلوب) صدقنى ..
لو كان ينغسل القلب كان إنغسل الوشم المرسوم على دقنى .
لازم يا ولدى القلوب تنضف و تصفى و ترضى بالمقسوم ..
وتصبر ع اللى إنكتب مهما تزيد الأحمال و تطول الهموم .
لابد من يوم ياولدى فيه راح يتنصب ميزان العدل ..
و الحق للمظلومين لابد يرجع و ربك يزيده بفضل .
إمشى يا ولدى ف طريقك و لا تدور على الأشواك ..
شوف سكة الورد تلاقى الدنيا حبيبة بتستناك .
أوعاك يا ولدى من اليأس و كترة التفكير ..
ألا الفكر و الهم يا ولدى بيعمل للدماغ تفجير .
نصيحتى ليك يا ولدى .. لا تطلع العيبة ..
و لا تبكى على اللى فات .. ألا البكى خيبة .
إفتح حساب السنة و إتعلم من اللى فات ..
و إضحك فى وش اللى جاى و قول يا رب هات .
ده الليل مهما يطول ح تنوره الشموسة ..
و السنة الجديدة تلاقيها بالحب أحلى عروسة .
بابا نويل ليليتها بيفوت شايل زمبيل ..
يفرق ع الناس هدايا ويقول .... سنة حلوة يا جميل بقلم / عز الدين محمود حامد

رائــــــــــــــــع

اسمح لي ان اصفق لك بحراره

احرف جميله

نورت صفحات الملتقى


فعلا... لو رحل عنا سواد القلوب

للأصبحت الدنيا جنه

واصبح الناس ملائكه


سيدي...

من اخت محبه لكــ .. اتمنى عدم
وضع اكثر من موضوع في يوم واحد
لليتسنى لنا قراءة روائعك

دمت بخير..
وكل عام وانت الى الله أقرب

أشكر لك ردك الرقيق يا أخت شهد و أتمنى أن تكون كتاباتى دائما عند حسن ظنك و تقديرك و أشكر لأنك لم تحرمينى من صالح دعائك ...